शालेय परिवहन समिती सहविचार सभा
शिरपूर येथील आर. सी. पटेल मराठी प्राथमिक शाळा शिरपूर येथे
शालेय परिवहन समिती सहविचार सभेचे आयोजन करण्यात आले.
सभेप्रसंगी माजी नगरसेवक दिलीप बोरसे,विद्यार्थी वाहतूक संघटनेचे
अध्यक्ष दत्तू माळी, उपाध्यक्ष नितीन पाटील, विद्यालयाचे मुख्याध्यापक
सी. डी. पाटील आदी उपस्थित होते. विद्यालयातील उपशिक्षक अविनाश राजपूत
यांनी रिक्षा चालकांना मार्गदर्शक सूचनांचे पालन होणेबाबत आवाहन केले.
यात त्यांनी रिक्षेला सुरक्षा गार्ड बसविणे, साईड ग्लास दुरुस्ती, मर्यादित विद्यार्थी
संख्या, विद्यार्थी वाहतूक असा नामोल्लेख वाहनावर करण्यात यावा तसेच प्रत्येक
वाहनात मोबाईल नंबरसह विद्यार्थी यादी, प्रथमोपचार पेटी याबाबत सविस्तर
मार्गदर्शन केले. मुख्याध्यापक सी. डी. पाटील यांनी आपल्या मनोगतात विद्यार्थी
विकासात रिक्षा चालकांचा देखील मोलाचा वाटा असल्याचे मत त्यांनी व्यक्त केले.
घर, शाळा, परिसर या संस्थाचे विद्यार्थी विकासासाठी मोलाचे योगदान असते.
त्याचबरोबर विद्यार्थी किमान एक तास रिक्षा चालकांच्या सहवासात राहतो.
त्याकरिता बऱ्याच गोष्टींचे निरीक्षण विद्यार्थी करीत असतो. रिक्षा चालकांनी
आपल्या मुलाप्रमाणे संस्काराचे धडे द्यावेत असे आवाहन मुख्याध्यापक यांनी केले.
विद्यार्थी वाहतूक संघटनेचे उपाध्यक्ष नितीन पाटील यांनी आपल्या मनोगतात
शाळेचे व पालकांचे नेहमीच सहकार्य लाभत असल्याचे सांगितले. कार्यक्रमाचे
सूत्रसंचालन गजेंद्र जाधव यांनी केले. आभार महेंद्र माळी यांनी मानले.
सभा यशस्वीतेसाठी रमेश शिरसाठ, संदीप चौधरी, जगदीश सोलंकी,
गोपाल न्हावी व शिक्षकेतर कर्मचारी संदीप पाटील, सागर पवार, सतिष पाटील,
यशोदा पाटील यांनी परिश्रम घेतले.
